I smelled love burning

Quasi cedrus exaltata sum in Libanon, et quasi cypressus in monte Sion;
Quasi palma exaltata sum in Gades, et quasi plantatio rosae in Jericho;
Quasi uliva speciosa in campis, et quasi platanus exaltata sum juxta aquam in plateis.
Sicut cinnamomum, et balsamum aromatizans odorem dedi;
quasi myrrha electa dedi suavitatem odoris;
et quasi storax, et gallianus, et ungula, et gutta, et quasi Libanus non incisus vaporavi habitationem meam, et quasi balsamum non mistum odor meus.
Ego quasi terebinthus extendi ramos meos, et rami mei honoris et gratiae.
Ego quasi vitis fructificavi suavitatem odoris, et flores mei fructus honoris et honestatis.
Ego mater pulchrae dilectionis, et timoris, et agnitionis, et sanctae spei.
In me gratia omnis vitae et veritatis, in me omnis spes vitae et virtutis.
Transite ad me omnes qui concupiscistis me, et a generationibus meis implemini;
Spiritus enim meus super mel dulcis, et hereditas mea super mel et favum;
Memoria mea in generationes saeculorum.
Qui edunt me, adhuc esurient; et qui bibunt me, adhuc sitient.
Qui audit me, non confundetur; et qui operantur in me, non peccabunt.
Qui elucidant me, vitam eternam habebunt.